таулы аймақтарда қорғаныс және шабуыл ұрыстарын жүргізу

(Ведение оборонительного и наступательного боя в горах)

таулы аймақтар күрделі бедерлер мен өтуге қиын табиғи кедергілердің, байланыссыз бағыттардың болуымен, жолдар мен елді мекендердің аздығымен, климаты мен өсімдіктерінің өте әр түрлілігімен, сондай-ақ тастақ өңірлердің көптігімен сипатталады. Таулы-шөлді жерлерге судың, отынның және құрылыс материалдарының жетіспеушілігі тән. Таулы аудандардың климаты жердің биіктігі мен тәулік уақытына байланысты температураның шұғыл ауытқуымен, сондай-ақ ауа райының күрт және жиі өзгеруімен сипатталады. Жоғары биіктікте күшті жел, тұман, нөсер, қар және бұрқасын болуымен қатар, сол уақытта ойпаңдар мен аңғарларда ауа райы құрғақ және жылы күйінде сақталуы мүмкін. Таулы аймақтардың ерекшеліктері бөлімшелердің ұрыс қимылдарына айтарлықтай әсер етеді. Таулы аймақтарда ұрыс қимылдары көбіне жекелеген бағыттар бойынша үлкен аралықтармен және ашық қапталдармен жүргізіледі. Осыған байланысты айналып өту мен құрсауды кең қолдануға мүмкіндіктер туады. Бөлімшелер ұзақ уақыт аралығында негізгі күштер мен көршілерден бөлініп, ұрыс қимылдарын өздігінен жүргізуі мүмкін. Бұл барлық командирлерден ұрыс қимылдарын аса мұқият ұйымдастыруды, үздіксіз және белсенді барлау жүргізуді, сондай-ақ жүктелген тапсырмаларды орындау үшін бөлімшелерді барлық керекті заттармен қамтамасыз етуді талап етеді. Таулы аймақтар жағдайларында тіпті шағын бөлімшелердің табанды, екпінді, ынталы қимылдар жасауы айтарлықтай табысқа жеткізуі мүмкін.